Num 16 | NdeIBE | STEP | UKhora indodana ka-Izhari, indodana kaKhohathi, indodana kaLevi, labathile abakoRubheni – uDothani kanye lo-Abhiramu, amadodana ka-Eliyabi, kanye lo-Oni indodana kaPhelethi baqala ukuba yiziqholo

Numbers 16

UKhora, uDathani lo-Abhiramu

1 UKhora indodana ka-Izhari, indodana kaKhohathi, indodana kaLevi, labathile abakoRubheni – uDothani kanye lo-Abhiramu, amadodana ka-Eliyabi, kanye lo-Oni indodana kaPhelethi baqala ukuba yiziqholo 2 bavukela uMosi. Bakwenza lokhu bendawonye lamanye amadoda angama 250 ako-Israyeli, abakhokheli abadumileyo babantu bakuleyondawo ababekhethelwe ukuthi babe ngamalunga enkundla. 3 Beza beliqembu ukuzomelana loMosi lo-Aroni bathi kubo, “Seledlulise amalawulo! Abantu bonke bako-Israyeli bangcwele, bonke ngamunye wabo, njalo uJehova uyabasekela. Pho kungani liziphakamisa ngaphezu kwabantu bakaJehova na?”

4 UMosi wathi ekuzwa lokhu, wawela phansi ngobuso. 5 Wasesithi kuKhora lakubalandeli bakhe: “Kusasa ekuseni uJehova uzaveza obala ukuthi ngubani ongowakhe lokuthi ngubani ongcwele, njalo uzamvumela lowomuntu ukuthi asondele kuye. Indoda azayikhetha uzayivumela ukuthi isondele phansi kwakhe.

6 Wena, Khora, kanye labalandeli bakho yenzani lokhu: Thathani izindengezi 7 kuthi kusasa libasele umlilo njalo litshisele impepha kuzo phambi kukaJehova. Indoda ezakhethwa nguJehova yiyo engcwele. Lina baLevi seledlulise amalawulo!”

8 UMosi wabuye wathi kuKhora, “Khathesi lalelani-ke, lina baLevi! 9 Kanti akulanelisanga yini ukuthi uNkulunkulu ka-Israyeli ulikhethile phakathi kwabo bonke abako-Israyeli njalo walisondeza phansi kwakhe ukuze lenze umsebenzi eThabanikeleni likaJehova lokuthi lizakuma phambi kwesizwe lisenzele inkonzo na? 10 Ukusondezile wena kanye labanye bakho abangabaLevi phansi kwakhe, kodwa-ke khathesi selifuna lobuphristi. 11 Ukubambana kwakho kanye labalandeli bakho kuyikumelana loJehova limphikisa. Kambe ungubani u-Aroni elingakhonona ngaye?”

12 Ngakho uMosi wabiza uDathani lo-Abhiramu amadodana ka-Eliyabi. Kodwa bona bathi, “Vele asizi! 13 Kambe bekungenelanga yini ukuthi wasikhipha elizweni eligeleza uchago kanye loluju ukuzasibulalela enkangala na? Khathesi usufuna lokubusa phezu kwethu?

14 Kunjalonje, awukasingenisi elizweni eligeleza uchago loluju kumbe ukusipha ilifa lamasimu kanye lezivini. Yebo kambe ufuna ukuze ukhiphe amehlo ala amadoda na? Hayi, asizi!”

15 Ngalokho uMosi wathukuthela kakhulu wasesithi kuJehova, “Ungawemukeli umnikelo wabo. Angithathanga lutho kubo ngitsho lobabhemi kodwa lokhu, njalo kakho loyedwa engimoneleyo.” 16 UMosi wathi kuKhora, “Wena kanye labo bonke abalandeli bakho kumele lime phambi kukaJehova kusasa – wena, labo, kanye lo-Aroni. 17 Indoda inye nganye kumele ithathe udengezi ifake impepha kulo – izindengezi ezingama 250 – njalo izalwethula phambi kukaJehova. Wena kanye lo-Aroni lani kufanele liveze ezenu izindengezi.” 18 Ngakho indoda inye ngayinye yathatha udengezi lwayo, yafaka umlilo kanye lempepha kulo, njalo yema loMosi lo-Aroni esangweni leThente lokuHlanganela.

19 Kwathi uKhora esebaqoqile abalandeli bakhe bephikisana labo esangweni leThente lokuHlanganela, inkazimulo kaJehova yabonakala kubo bonke abantu ababebuthene kuleyondawo. 20 UJehova wathi kuMosi lo-Aroni, 21 “Sukani phakathi kwalaba ababutheneyo ukuze ngibabhubhise khathesi.”

22 Kodwa uMosi lo-Aroni bawa phansi ngobuso bakhala bathi, “O Nkulunkulu, Nkulunkulu wemiphefumulo yabantu bonke, uzathukuthelela abantu bonke jikelele ngenxa yomuntu oyedwa owonileyo na?”

23 Ngakho uJehova wathi kuMosi, 24 “Tshela ibandla uthi, ‘Sukani lixekele amathente aboKhora, loDathani lo-Abhiramu.’ ”

25 UMosi wasukuma waya kuDathani lo-Abhiramu, kwathi labadala bako-Israyeli bamlandela. 26 Waqonqosela ibandla wathi, “Buyelani emuva lisuke emathenteni abantu laba abangalunganga! Lingathinti lutho olungolwabo ngoba lingenzenjalo lizakhuculwa ngenxa yezono zabo.” 27 Ngalokho basuka emathenteni aboKhora, loDathani lo-Abhiramu. UDathani lo-Abhiramu basebephume phandle bemi labomkabo, labantwababo kanye labancane emasangweni amathente abo.

28 UMosi wasesithi, “Nansi indlela elizabona ngayo ukuthi uJehova ungithumile ukuzakwenza konke lokhu engikwenzayo kanye lokuthi akusiyongqondo yami. 29 Nxa amadoda la ezazifela ngendlela abantu abazifela ngayo, kuzabe kusitsho ukuthi uJehova kangithumanga. 30 Kodwa nxa uJehova ezakwenza esingakaze sikubone okunye okutsha kwenzakale ukuthi umhlaba uvuleke ubaginye kanye lakho konke okungokwabo, bangene bephila engcwabeni, kulapho elizakwazi khona ukuthi amadoda la ameyisile uJehova.”

31 Kwathi eqeda ukutsho lokhu, umhlaba wavuleka ngaphansi kwabo, 32 wavuleka wabaginya bona, kanye labantwababo lamadoda wonke ayekhokhelwa nguKhora kanye lezimpahla zawo. 33 Batshona engcwabeni bephila, lakho konke okwakungokwabo; umhlabathi wabagubuzela, kwaba yikutshabalala basuswa kwabakibo.

34 Besizwa ukukhala kwabo, bonke abako-Israyeli ababelapho babaleka, beklabalala besithi, “Umhlaba uzasiginya lathi!”

35 Kwavela umlilo kuJehova watshaya waqothula amadoda angama 250 ayenikela ngempepha.

36 UJehova wathi kuMosi, 37 “Tshela u-Eliyazari indodana ka-Aroni, umphristi, ukuthi athathe izindengezi azikhiphe emlotheni achithele amalahle endaweni ekhatshana, ngoba izindengezi lezi zingcwele – 38 izindengezi zamadoda onileyo aze alahlekelwa yimpilo yawo. Khanda lezozindengezi ukuze zendlaleke e-alithareni, ngoba zethulwa phambi kukaJehova zaba ngezingcwele. Azibe yisibonakaliso kwabako-Israyeli.”

39 Ngakho u-Eliyazari umphristi wabutha izindengezi zethusi ezazilethwe yilabo abatshayo, walungisa ukuba zikhandwe zendlalwe e-alithareni, 40 njengokulaywa kukaMosi nguJehova. Lokhu kwakuzakhumbuza abako-Israyeli ukuthi kakho ovunyelwayo ukutshisa impepha phambi kukaJehova ngaphandle kuka-Aroni lesizukulwana sakhe, funa abe njengoKhora labalandeli bakhe.

41 Ngosuku olulandelayo abako-Israyeli bonke bakhonona basola uMosi lo-Aroni. Bathi, “Selibulele abantu bakaJehova.”

42 Kodwa kwathi ibandla selibuthene bephikisa uMosi lo-Aroni njalo sebekhangele eThenteni lokuHlanganela, masinyane iyezi lalisibekela kwavela inkazimulo kaJehova.

43 Ngakho uMosi lo-Aroni baya phambi kweThente lokuHlanganela, 44 uJehova wasesithi kuMosi, 45 “Suka kulelibandla ukuze ngibatshabalalise.” Ngakho bawa phansi ngobuso.

46 Kusenjalo uMosi wathi ku-Aroni, “Thatha udengezi lwakho uthele impepha kulo, ndawonye lomlilo ovela e-alithareni, uphange uye ebandleni ukuze ubenzele indlela yokubuyisana. Ulaka lukaJehova lubonakele; isifo sesiqalisile.” 47 Kwaba njalo u-Aroni wenza okwakutshiwo nguMosi, waphanga wangena phakathi kwebandla. Isifo sesivele sesiqalisile ebantwini, kodwa u-Aroni wanikela impepha wabenzela indlela yokubuyisana. 48 Wema phakathi kwabaphilayo lasebefile, isifo saphela.

49 Kodwa kwasekufe abantu abazi 14,700 bebulawa yisifo, phezu kwalabo ababefe ngenxa kaKhora. 50 Ngemva kwalokho u-Aroni wabuyela kuMosi esangweni leThente lokuHlanganela, njengoba isifo sasesiphelile.